سؤال “ليه” أحيانًا بيكون أكتر سؤال جارح في التربية، والإدارة، والعلاقات.
.png)
مش كل نصيحة لازم تبدأ بـ: ليه؟
ليه عملت كده؟
ليه غلطت؟
ليه ما سمعتش الكلام؟
ليه اتصرفت بالشكل ده؟
سؤال “ليه” أحيانًا بيكون أكتر سؤال جارح في التربية، والإدارة، والعلاقات.
لأنه مش دايمًا بيفتح باب الإصلاح.
أحيانًا بيفتح باب الدفاع.
والكذب.
والإحراج.
والعناد.
والقفل من جوا.
سيدنا رسول الله ﷺ علّمنا إن التنبيه له أدب.
والتربية لها ذوق.
والنصيحة مش معناها إنك تكسر اللي قدامك.
سيدنا عبد الله بن عمرو رضي الله عنهما قال:
إن النبي ﷺ لم يكن فاحشًا ولا متفحشًا، وكان يقول:
«خياركم أحاسنكم أخلاقًا».
يعني ما كانش في كلامه قبح.
ولا بذاءة.
ولا إهانة.
ولا ألفاظ تكسر الخاطر.
حتى لما يكون في خطأ يستحق التنبيه، كان أدبه ﷺ عالي جدًا.
ما كانش يفضح الشخص.
ولا يواجهه مواجهة تكسره.
ولا يحوله من إنسان أخطأ، إلى إنسان مُهان.
كان ينبه على الفعل، لا يطعن في الفاعل.
وفي فرق كبير بين إنك تقول:
الفعل ده غلط.
وبين إنك تقول:
أنت غلط.
في فرق بين:
التصرف ده مش مناسب.
وبين:
أنت غبي.
في فرق بين:
اللي حصل محتاج يتظبط.
وبين:
إزاي تعمل كده؟ أنت مش بتفهم؟
المنهج النبوي يعلّمنا إننا نكره المعصية، لا نحتقر العاصي.
نرفض الخطأ، لا نكسر المخطئ.
نصحح الفعل، لا نجرح الإنسان.
وكان ﷺ إذا أراد أن ينبه على أمر، يقول:
«ما بال أقوام يفعلون كذا؟»
ما يذكرش اسم الشخص.
ولا يفضحه قدام الناس.
علشان اللي غلط يستحي ويصلح من غير ما يتكسر.
واللي بيعمل نفس الغلط ينتبه.
والاحترام يفضل محفوظ.
دي حكمة عظيمة في التربية.
لأن المواجهة الفجة تكسر القبول.
وتضيع الهيبة.
وتخلي الشخص بعد كده يتجرأ على النصيحة.
أول مرة يتجرح، يتألم.
تاني مرة يقاوم.
تالت مرة يعاند.
وبعد شوية العلاقة نفسها تتشوه.
عشان كده مش كل موقف محتاج تبكيت.
ومش كل خطأ محتاج فتح تحقيق.
ومش كل إنسان غلط لازم نطلعه على المسرح ونقول له: ليه؟
أحيانًا أنت عارف ليه.
وهو عارف ليه.
فبلاش تدخلوا في دائرة دفاع واتهام.
ادخل على اللي بعده.
على الحل.
على التصحيح.
على المستقبل.
بدل ما تقول لابنك:
ليه خدت العربية من ورايا؟
قول له:
المرة الجاية لو محتاجها، كلمني الأول.
بدل ما تقول للموظف:
ليه عملت الغلط ده؟
قول له:
تعالى نشوف إزاي نصلح الموضوع، وإيه النظام اللي يمنع تكراره.
بدل ما تقول لحد:
إزاي تقول الكلام ده؟
قول له:
الكلام ده وجعني، والمرة الجاية محتاجين نتكلم بطريقة أهدى.
كده أنت نقلت الموقف من جلد للماضي، إلى بناء للمستقبل.
من تبكيت، إلى تربية.
من كسر، إلى إصلاح.
من خسارة علاقة، إلى كسب قلب.
النبي ﷺ ما كانش يفتش في الماضي إلا في موضع المدح.
لكن في الذم والتقليب والتوبيخ، ده غالبًا ما يبنيش.
بيفش غضب الناصح بس.
إنما التربية الحقيقية تسأل:
إزاي أصلح؟
إزاي أحفظ العلاقة؟
إزاي أوجّه من غير إهانة؟
إزاي أوصل المعنى من غير ما أكسر قلب اللي قدامي؟
القوة مش إنك تعرف تحرج.
القوة إنك تعرف تربي.
والحكمة مش إنك تكسب الموقف.
الحكمة إنك تكسب الإنسان.
فلو أنت أب، أو أم، أو مدير، أو صاحب، أو مربي…
خلي عندك رصيد احترام.
عدّي مواقف بحكمة.
صحح من غير فضيحة.
انصح من غير قسوة.
وصف الخطأ، لكن ما تشتمش الشخص.
ادخل على الحل، بدل ما تفضل تحفر في الغلط.
لأن الإنسان اللي بتحفظ كرامته وقت الخطأ، غالبًا هيقبل منك وقت النصيحة.
أما اللي بتكسره، فحتى لو كلامك صح، قلبه ممكن يقفل منك.
.png)
تعليقات
إرسال تعليق