في 9 جُمل لو سمعتهم من خطيبتك…
في 9 جُمل لو سمعتهم من خطيبتك…
متعديهمش كأنهم كلام عادي، لأنهم ممكن يكشفولك شكل حياتكم بعد الجواز!
أنا إسلام فؤاد، ودي علامات لازم تاخد بالك منها في فترة الخطوبة.
أول جملة:
“أهلي أهم حاجة، ومفيش حاجة هتتغير بعد الجواز.”
احترام الأهل واجب، لكن لازم تكون فاهمة إن بعد الجواز بقى عندها بيت وزوج ومسؤوليات جديدة ليهم أولوية.
تاني جملة:
“أنا مبحبش القيود وبحب أعيش براحتي.”
الجواز فيه مسؤوليات واتفاقات، فلو شايفة إن أي التزام قيد، هتدخلوا في صدامات كتير.
تالت جملة:
“أنا مش هسمحلك تختلف معايا.”
دي مش شراكة… دي محاولة لفرض الرأي، لأن الطبيعي إنكم تختلفوا وتتناقشوا باحترام.
رابع جملة:
“كل الرجالة خاينين وكدابين.”
التعميم ده ممكن يكون وراه انعدام ثقة، ويحول حياتك بعد كده لشك واتهامات طول الوقت.
خامس جملة:
لما تطلب حاجة فوق إمكانياتك وتقولك:
“أنا مليش دعوة… اتصرف.”
خلي بالك، لأن الجواز مشاركة، مش طرف يطلب والتاني يستلف ويضغط على نفسه علشان ينفذ.
سادس جملة:
“أنا بحبك علشان بتجيبلي وبتعملي.”
الحب اللي مربوط بالمصلحة ممكن ينتهي أول ما ظروفك تتغير أو متقدرش توفر المطلوب.
سابع جملة:
“لازم تبعد عن أهلك وصحابك عشاني.”
العزل مش حب، وممكن يبدأ بغيرة بسيطة وينتهي بسيطرة كاملة عليك.
تامن جملة:
“أنت مش راجل… أنت فاشل… وأهلك كذا وكذا.”
اللي بتقلل منك ومن أهلك في الخطوبة، غالبًا هتتمادى أكتر بعد الجواز، لأن الاحترام هو أساس العلاقة.
تاسع جملة:
“أنت مش عارف أنت متجوز مين أو بنت مين.”
دي ممكن تكون علامة على الغرور والتعالي، وإنها شايفة نفسها أحسن منك.
بس خد بالك…
مش معنى إن جملة من دول اتقالت مرة وقت غضب إنك تجري تفسخ الخطوبة.
شوف هل اعتذرت؟
هل اتغير أسلوبها؟
ولا الكلام بيتكرر وأفعالها بتأكد إنه فكر ثابت عندها؟
لو اتأكدت إن دي قناعتها وطريقة تعاملها، ومفيش استعداد للتفاهم أو التغيير…
يبقى لازم تقف وتراجع قرارك، لأنك ممكن تكون داخل على جوازة مليانة مشاكل.
واستنوا الفيديو الجاي للبنات:
جُمل لو سمعتيها من خطيبك، تبقى علامة حمراء ولازم تخلي بالك يا بنت الناس.
واكتبولنا في التعليقات:
إيه جملة تانية ممكن تقلق الشاب في فترة الخطوبة؟
.png)
تعليقات
إرسال تعليق